حضرت موسیٰ کے زمانے میں جب خدا تعالیٰ نے بنی اسرائیل قوم کو ملکِ مصر کی غلامی سے رہائی بخشی تو خدا نے بنی اسرائیلیوں کو حکم دیا کہ اُن کا ہر خاندان ایک برّہ ذبح کرے اور اُس کا خون اپنے دروازے کی چوکھٹ پر لگائے اور اُس برّہ کا گوشت بے خمیری روٹی کے ساتھ کھائیں۔ اِس حکم کی تعمیل کی بدولت بنی اسرائیلیوں کے پہلوٹھے بچے تو بچ گئے لیکن فرعون اور مصریوں کے پہلوٹھے بچے خدا کے فرشتے نے ہلاک کر دیئے۔ خدا نے بنی اسرائیلیوں کو حکم دے رکھا تھا کہ تمام بنی اسرائیل قوم اس واقعے کی یاد میں ہر سال ایک ضیافت یا عید منایا کرے۔ اس ضیافت کو عیدِ فسح کہتے ہیں۔
یسوع مسیح نے اپنے پکڑ وائے جانے سے قبل اپنے شاگردوں کے ساتھ اس عید کو منایا اور عیدِ فسح کا کھانا بھی کھایا۔

مزید سمجھنے کے لئے درج ذیل انجیلِ مقدس کے حوالے کا مطالعہ کریں۔

جب شام ہُوئی تو وہ بارہ شاگِردوں کے ساتھ کھانا کھانے بَیٹھا تھا۔
اور جب وہ کھا رہے تھے تو اُس نے کہا مَیں تُم سے سَچ کہتا ہُوں کہ تُم میں سے ایک مُجھے پکڑوائے گا۔
وہ بہُت ہی دِلگِیر ہُوئے اور ہر ایک اُس سے کہنے لگا اَے خُداوند کیا مَیں ہُوں؟
اُس نے جواب میں کہا جِس نے میرے ساتھ طباق میں ہاتھ ڈالا ہے وُہی مُجھے پکڑوائے گا۔
اِبنِ آدم تو جَیسا اُس کے حق میں لِکھا ہے جاتا ہی ہے لیکِن اُس آدمِی پر افسوس جِس کے وسِیلہ سے اِبنِ آدم پکڑوایا جاتا ہے! اگر وہ آدمِی پَیدا نہ ہوتا تو اُس کے لِئے اچھّا ہوتا۔
اُس کے پکڑوانے والے یہُوداہ نے جواب میں کہا اَے ربّی کیا مَیں ہُوں؟ اُس نے اُس سے کہا تُو نے خُود کہہ دِیا۔
جب وہ کھا رہے تھے تو یِسُوع نے روٹی لی اور بَرکَت دے کر توڑی اور شاگِردوں کو دے کر کہا لو کھاؤ۔ یہ میرا بَدَن ہے۔
پھِر پیالہ لے کر شُکر کِیا اور اُن کو دے کر کہا تُم سب اِس میں سے پِیو۔
کِیُونکہ یہ میرا وہ عہد کا خُون ہے جو بہُتیروں کے لِئے گُناہوں کی مُعافی کے واسطے بہایا جاتا ہے۔
مَیں تُم سے کہتا ہُوں کہ انگُور کا یہ شِیرہ پھِر کبھی نہ پِیُوں گا۔ اُس دِن تک کہ تُمہارے ساتھ اپنے باپ کی بادشاہی میں نیا نہ پِیُوں۔
(متّی 26 باب 20 تا 29 آیات)

مندرجہ ذیل سوالات کے جوابات دیں۔