اِس زبُور سے جہاں ہم یہ سیکھتے ہیں کہ خُدا تعالیٰ پروردگار ہیں وہاں یہ بات بھی عیاں ہوتی ہے کہ آپ کسی خاص گروہ اور قوم کے ہی ربّ نہیں بلکہ ہر انسان اور جاندار کے پالنے والے ہیں۔ اِسی لئے زبور نویس خُدا تعالیٰ سے مخاطب ہو کر فرماتے ہیں
”سب کی آنکھیں تُجھ پر لگی ہیں۔
تُو اُن کو وقت پر اُن کی خوارک دیتا ہے۔
تُو اپنی مُٹھی کھولتا ہے
اور ہر جاندار کی خواہش پوری کرتا ہے“ (زبور145: 15-16)۔

”خُداوند کے نام کی حمد کرو۔
خُداوند سب قوموں پر بلند و بالا ہے۔
اُس کا جلال آسمان سے بر تر ہے
خُداوند ہمارے خُدا کی مانند کون ہے
جو عالمِ بالا پر تخت نشین ہے
جو فروتنی سے آسمان و زمین پر نظر کرتا ہے؟
وہ مسکین کو خاک سے
اور محتاج کو مزبلہ سے اُٹھا لیتا ہے“(زبور113: 3-7)
اِسی طرح صحائف ِ مقدّسہ میں کم از کم تین مقامات پر خُدا تعالیٰ کو ” ربّ العالمین “ کہہ کر مخاطب کیا گیا ہے۔ (دیکھیں میکاہ4: 13؛ زکریاہ4: 14؛ زکریاہ6: 5)